Vətən müharibəsi şəhidi Salıyev Əfsan İlkin oğlunun doğum günü qeyd olunub.

24 İyun 2022-ci il tarixdə Yeni Azərbaycan Partiyası Quba rayon təşkilatının sədri Fidan Hüseynova və təşkilatın əməkdaşları, Vətən müharibəsi şəhidi Salıyev Əfsan İlkin oğlunun doğum günü münasibətilə ailəsini ziyarət etmişlər.
Görüşdə Əfsan Salıyevin şərəfli həyat və döyüş yolu, torpağa, milli-mənəvi dəyərlərə bağlılığı, müqəddəs şəhidlik zirvəsinə ucalmasından söhbət açılmış, şəhid ailəsinin qayğı və problemləri dinlənilmişdir. Sədr, dövlətin şəhid ailələrinə və qazilərə həssas münasibətindan söz açaraq cənab Prezidentimiz İlham Əliyev və Birinci vitse-prezident Mehriban xanım Əliyeva tərəfindən daima müvafiq kateqoriyadan olan ailələrə doğma münasibət göstərildiyini, onları narahat edən problemlərin həlli ilə bağlı təxirəsalınmaz tədbirlərin həyata keçirildiyini qeyd etmişdir. Şəhidin ailə üzvləri göstərilən diqqət və qayğıya görə Cənab Prezident İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildirmişlər.

Xatırladaq ki, Əfsan Salıyev 2020-ci ilin iyulun 9-da həqiqi xidmətə yollanmış və cəmi 3 ayın əsgəri olmasına baxmayaraq minlərlə cəsur oğullarımız kimi sentyabrın 21-də könüllü olaraq təlimlərə qoşulub, sentyabrın 27-də başlanan Vətən müharibəsində Suqovuşan və Ağdərə istiqamətində gedən döyüşlərdə fəal iştirak edib. 2020-ci il oktyabrın 3-də Suqovuşan İstiqamətində gedən qanlı döyüşlər zamanı qəlpə yarası alaraq şəhidlik zirvəsinə ucalmışdır. Azərbaycan Respublikasının Prezidenti Cənab İlham Əliyevin müvafiq sərəncamları ilə Əfsan Salıyev ölümündən sonra Azərbaycanın ərazi bütövlüyünün təmin edilməsi uğrunda gedən döyüş əməliyyatlarında döyüş tapşırıqlarını şərəflə yerinə yetirdiyinə görə "Vətən uğrunda"," İgidliyə görə" və "Suqovuşanın azad olunmasına görə" medalları ilə təltif olunmuşdur. Subay idi. Vətənimizin toxunulmazlığı uğrunda şəhid olan Əfsan Salıyev 2020-ci il oktyabrın 4-də Quba rayonunun II Nügədi kənd qəbiristanlığında dəfn edilmişdir.

Allah şəhidlərimizə rəhmət eləsin.

Fidan Hüseynova
Quba rayon təşkilatının sədri.
"Vətənim-Azərbaycandır.az".